શંકરસિંહ વાઘેલા બાપુએ સાગબારા જંગલ-જમીન વિવાદ મુદ્દે સરકાર સામે આક્રમક સવાલો ઉઠાવ્યા હતા. તેમણે આદિવાસી સમાજને જંગલ અને જમીનના સાચા માલિક ગણાવી “જમીન મારી, જંગલ મારું, પાણી મારું” ના અધિકારની વાત કરી હતી. બાપુએ સ્ટેજ પરથી કહ્યું કે, આગામી ચૂંટણીને ધ્યાનમાં રાખીને આદિવાસી સમાજને પોતાના હકો માટે નિર્ણય લેવાની અપીલ કરી હતી. તેમણે સરકાર સામે અસંતોષ વ્યક્ત કરતાં કહ્યું કે, “12 મહિના પછી તમારા હાથમાં સત્તાની ચાવી હશે” અને આગામી ચૂંટણીમાં કોઈ દબાણ કે શરમ-સંકોચ વગર નિર્ણય લેવા આહ્વાન કર્યું હતું.
આ જાહેરસભા વિપક્ષ આગેવાનોએ પણ આકરા પ્રહાર કરતા જણાવ્યું હતું કે, રાજ્યના વન મંત્રી દ્વારા ખેડૂતોને પારણાં કરાવી સનદ આપવાની વાત કરવામાં આવી હતી, પરંતુ તે માત્ર આશ્વાસન પૂરતું જ સાબિત થયું છે. ખેડૂતોનો આક્ષેપ છે કે 25 વર્ષથી જે જમીનો પર તેઓ ખેતી કરી રહ્યા છે, ત્યાં વન વિભાગ પ્લાન્ટેશન કરીને જમીન પર કબજો મેળવવા પ્રયાસ કરી રહ્યું છે. વન કર્મચારીઓ દ્વારા વારંવાર ખેડૂતોને હેરાન કરવામાં આવતા હોવાનો પણ આક્ષેપ કરવામાં આવ્યો હતો.
આ મામલે કોંગ્રેસ ધારાસભ્ય અનંત પટેલે પણ આક્રમક ભાષણ આપતાં જણાવ્યું હતું કે, “અમે તીર-કમઠાં બુઠાં નથી લીધાં.” તેમણે આંદોલનને વધુ ઉગ્ર બનાવવાની ચીમકી આપતાં કહ્યું કે હવે ખેડૂતો જેલભરો આંદોલન માટે પણ તૈયાર છે. તેમણે ભાજપના નેતાઓની ગેરહાજરી સામે સવાલો ઉઠાવી સરકાર પર નિશાન સાધ્યું હતું. જે બાદ ખેડૂતોના આગેવાનોએ આગામી દિવસોમાં બળદગાડાં સાથે ગાંધીનગર પહોંચીને સરકાર સામે આંદોલન કરવાની જાહેરાત કરી હતી. સાથે જ અત્યાર સુધી ચાલેલા સત્યાગ્રહ છતાં પ્રશ્નનું નિરાકરણ ન આવતાં હવે ઉગ્ર આંદોલન કરવાની ચીમકી ઉચ્ચારવામાં આવી હતી.
